Abuztuaren 2an, igandearekin, Donostiako Cristina Enea parkeak Glad is the Day musika jaialdiaren hamargarren edizioa hartuko du. Maruxak, Geminiss, Adur, Telmo Trenor, Space Surimi, Amaia Yaniz eta beste hainbat artista bildu ditu aurtengo kartelak. Ohi bezala, kontzertuak doakoak izango dira eta familia osoarentzako moduko ekitaldiak (azoka, piknikak, haurrentzako jarduerak) egongo dira, 12:00etan hasi eta 21:00ak bitarte.
Bi agertokitan banatuko dute musika eskaintza. Agertoki nagusian, Ruïnosa y las Strippers de Rahola taldearen “subnopunktrabestia”, Sonido Gallo Negro mexikarren psikodelia tropikala, Perfecto Miserable taldearen noisepop eta rock alternatiboa, Maruxak kolektiboaren euskal folklorearen berrirakurketa queer eta komunitarioa, The Safety Pins taldearen energia handiko punk rocka, Geminissen rock proposamena eta LUP talde donostiarraren funk garaikideaz gozatzeko aukera izango da. Hondamen Sonikoa agertokian, berriz, Adur taldearen rave-punka, Lechuga Zafiroren erritmo latinoamerikarrak, Somadamantinaren trap futurista, Space Surimiren hip hopa, Telmo Trenorren elektronika organikoa, Amaia Yanizen techno melodikoa, Baetchuren nahasketa eklektikoak eta Maleza kolektiboko Siano B2B Melinaren saioak izango dira protagonista.
Gaua iristean eta asteburua luzatu nahi dutenentzat, Le Bukowski eta Dabadaban DJ gehiago izango dira.
