Peiremans+ taldeak kontzertuko bira iragarri du 2026ko abendurako, 10 urterik behin elkartzeko ohiturari eutsiz. Gorka Urbizu, Haritz Beristain ‘Txiki’ eta Imanol Ubeda musikariak berriz elkartuko dira, Halley Tour izeneko biran.
Honela iragarri dute sare sozialetan: “2026ko abenduan kontzertu sorta bat emango dugu eta horren ondotik, atzera urte luzez desagertuko gara. Dagoeneko beroketak egiten ari gara, inoiz baino gogotsuago gatoz!”.
Biarritzen (abenduak 4), Azpeitian (abenduak 11), Gasteizen (abenduak 17), Iruñean (abenduak 23), Donostian (abenduak 26 eta 27) eta Bilbon (abenduak 29) joko dute. Lehen kontzertu horietako sarrerak minutu gutxian agortuta, Azpeitia eta Bilborako datak berriak iragarri dituzte, eta horiek ere jarraian agortu dira. Arrakastaz jabetuta, tiketik gabe gelditu diren horientzako data gehiago lotzeko aukera dagoela jakinarazi du taldeak.
10 urterik behin
Peiremans+ banda 2005ean jaio zen, eta urte berean Peiremans izeneko bost kantako diskoa kaleratu zuten. EP horren baitan, Euskal Herriko plaza, taberna eta aretoetan ereserki bihurtu diren “Send Flowers”, “Zuretzako hitz ederrak” eta “Joan zinen” abestiak entzun genituen estreinakoz.
10 urte igarota, 2015ean, berriz elkartu eta kontzertu batzuk eman zituzten. Urtebete geroago, bost kantaz osaturiko Bigarren Saria izeneko lana kaleratu zuten. Bertatik atera ziren , besteak beste, “Bemidji” eta “Radiomaria” kanta ezagunak.
