Musika Bulegoa Sariak: Olaia Inziarte, Sara Zozaya, EZEZEZ eta Ødei saritu dituzte, Ainhoa Vitoriak eta Aitziber Gradosek aurkeztutako ekitaldian

Olaia Inziarte, Sara Zozaya, EZEZEZ, Ødei, Izaki Gardenak, Maite Larburu eta Fermin Muguruza saritu dituzte 2026ko Musika Bulegoa Sarietan. Biarritzeko Atabal aretoan izan da garaikur banaketaren hamargarren edizioa, Ainhoa Vitoria eta Aitziber Grados Gazteako esatariek aurkeztutako galan.

Olaia Inziartek ireki du ekitaldia, “eman abisua” kantaren zuzeneko bertsio akustikoarekin. Jarraian, Inziarte bera izan da gaueko lehen garaikurra jaso duen artista. Musika Bulegoak nafar artistaren zerrautsa diskoa saritu du, eta musikariak “hankaz goiti dagoen mundu honetan” heldulekuak sortzeko beharraren inguruko diskurtsoa egin du.

Atzetik etorri dira Jon Saenz eta Maite Ruiz de Erentxunen sariak, eta Atabaleko publikoak bi artistak elkarrekin zuzenean jotzeko aukera izan du. Sara Zozayak ere abestu du, attä diskoarengatik emandako Musika Bulegoa Saria jaso ostean. Donostiar artistak bidean lagundu diotenei eta aretoan zegoen aitari eskaini dio garaikurra.

EZEZEZ, zuzenean jo duen Izaki Gardenak taldeak, Maite Larburu, Javier Corral, Xabi Aburruzaga (publikoaren saria) eta Fermin Muguruza saritu dituzte. Azken honek Etxepare Euskal Institutuaren garaikurra eraman du, bere azken biran euskal musika gure mugetatik kanpo zabaltzeko egindako lanagatik. Honek "euskal musikaren ekosistema bizirik mantentzen duten pertsona, kolektibo, gaztetxe eta espazio guztiei" eskerrak eman dizkie. 

Ødeiek jaso du gaueko azken saria, Goizegi hiltzeko diskoagatik. Lapurtar rap musikariaren zuzenekoak itxi du 2026ko Musika Bulegoa Sarien gala.