Boga Boga festibalaren edizio berri bat ospatuko dute irailaren 11tik 13ra, Donostian. Besteak beste, Marte Lasarte, Merina Gris, BARRRK, Mala Gestión, Alai, zeatikez, Rüdiger, Mursego eta Gailuren izenak aurkitu ditugu kartelean.
Kartela osatzeko, Alice Phoebe Lou hegoafrikar bakarlaria, Ana Roxanne frantsesaren ambient esperimentala, Bodega New Yorkeko bandaren art-punka, Cervatana, Juan Tatorri DJ gipuzkoarra, Julia Sabaté bakarlaria, Kulata, Llúcia Pla, Lorea Argarate bizkaitar artista, MYD, Rachid B, Remei de Ca La Fresca kataluniarren rock bortitza, RUBIO ekoizle eta artista txiletarra, Sébastien Tellier eta Yung Prado zuzenean ikusteko aukera izango da.
Jaialdiko antolatzaileek prentsa ohar bidez adierazi dutenez, "nazioarteko artista independenteen eta sortzen ari den tokiko eszenaren aldeko apostua berresten" duen programazioa osatu dute. "Donostiak urteak daramatza berriro tokiko DNA izango duen musika independenteko jaialdi bat izatea eskatzen. Eta alderdi emozionalari zein hiriko agendari dagokionez dagoen hutsune hori bete nahi dugu", erantsi dute.
Ordainpeko zein doako zuzenekoak ikusteko aukera izango da, Miramar Jauregian, Easo Plazan eta Dabadaban. Jaialdiko bonuak salgai daude dagoeneko, 60 euroan. Eguneko tiketek, ostera, 35 euroko prezioa dute.
