“Ingelesez idazteak anonimotasunean mantentzen gintuen, eta euskaraz idazten hastean gure bizipenak mahai gainean jarri ditugula sentitu dugu”

Ramona’s First Evil Boyfriend taldeko Andrea Pozo eta Julen Hidalgo “B Aldea”n izan dira, Eatxi izeneko hirugarren diskoa aurkezteko.  2022an kaleratu zuten bigarren diskoa, eta ordutik denboraldi luze bat eman dute oholtzara igo gabe. Martxoa bukaeran atera zuten lan berria, eta ordutik jasotako babesarekin oso eskertuta daudela kontatu dute taldekideek.

Lehen urteetan ingelesez abesten zuen Ramona’s First Evil Boyfriendek, nerabezarotik entzundako musika erreferenteen hizkuntzari eutsiz. Orain, baina, euskeraz sortzen hasi direla kontatu digu Andrea Pozok. Azken aldian, euskal talde asko entzun ditu eta pianoan esertzen denetan euskeraz ateratzen zaizkio lehen hitzak. Aldaketa organikoa izan den arren, euskera erabiltzeak biluzik sentiarazten duela aitortu digu musikariak.

Ordizian, Oviedon, Elgoibarren, Madrilen, Azkoitian eta Donostian aurkeztu dute diskoa, eta lehen bira honetako hitzordu bereziak gelditzen zaizkiela kontatu digute: Bilbo (ekainak 20) eta Zarautz (uztailak 23).