Burutik: “Badago musikari belaunaldi bat panfletotik poesiara pasa nahian gabiltzala; ez dugu politika utzi nahi, baina popa egin nahi dugu”

Jokin Barriola ‘B Aldea’n izan da, Burutik taldeak atera berri duen “Magoak Badaki” single berria aurkezteko. Urte bukaeran aterako duten Ipuinak diskoko hirugarren aurrerapena da eskuartean ekarri diguna.

Taldeak azkenaldian bizitako aldaketez galdetuta, abeslari aldaketa aipatu du gonbidatuak. Luar Alberdi taldeko abeslariak taldea utzi eta Naroa Goñi fitxatu du nafar bandak. Honela azaldu du musikariak: “Luarrekin uzteko modua oso sanoa izan zen, berak erabaki zuen, eta berarekin harremanetan jarraitzen dugu. Naroak sekulako lan hartu du, eta oso pozik gaude berarekin eta bera gurekin”.

Nafarroako musikaren eszenan popak izandako susperraldia (nafarpop) ere izan dute hizpide Jokin Barriola eta Julen Idigorasek. Loraldi horren parte sentitzen da Burutik: “Zerikusi handia du Nafarroan denak hezitu garela punk-oi generoaren itzalean, eta ari garela panfletotik poesiara pasa nahian, eta poesiara pasatze horretan politika ez dugu utzi nahi, baina soinu poperoagoa egin nahi dugu”.

Ipuinak diskoak bilkura kontzeptualik ez duen arren, nahiko lan politikoa atera zaiela aitortu digu artistak. Hala, kanta gehienetan kapitalismoarekin eta honek egungo gizartean dituen beso guztiekin kritiko agertuko dira euren disko berrian.