Musika, musikariaz gain: ekoizle, manager eta prentsa arduradunak ezagutzen, B Aldeako Solasaldietan

Must +Pro ekimenaren baitan, Julen Idigoras eta Ainhoa Vitoriak zuzeneko solasaldi berezia egin dute, Bilboko Sala BBKtik. Kiliki, Ane Garcia, ALAI, Ke Lepo, Ander Merino eta Janus Lester gonbidatu dituzte.

Ainhoa Vitoria eta Julen Idigoras “B Aldea”ko aurkezleek Bilboko Sala BBKra eraman dute saioa, Must +PRO ekimenaren programazioaren baitan. Aretoko oholtza gainean agertu dira bi esatariak, gonbidatuen hizketaldiez eta zuzeneko musikaz gozatu eta gozarazteko prest.

Solasaldia hasi orduko, Kiliki musikaria eta Ane Garcia Last Tourreko prentsa koordinatzailea gonbidatu dituzte oholtza gainera. PR edo prentsa arduradunaren figuraz aritu dira, baita artisten musika zabaltzeko estrategiez ere. Sare sozialak ere atera dira mahai gainera, artistaren adinaren araberako tresna gisa. Izan ere, Internetekin jaio diren musikarien kasuan, askatasun handiagoa ematen zaiela argitu dute. Profil sozialean sakonduta, benetakotasunaren bilaketaz hausnartu dute gonbidatuek.

Artistaren proiektuen hedapen prozesuaz eta hedabideei kantak saltzeko estrategiez ere aritu dira gonbidatuak. Musikari bakoitza mundu bat dela azaldu du Garciak; Kilikiren kasuan, abestiek diskurtso nahikoa dutenez, narratiba eraikitzeko beharrik izaten ez dutela argitu du.

Lehen solasaldia bukatzeko, musikaren atzean dauden langileen arteko genero arrakala aipatu dute. Bada, Ane Garciak azaldu duenez, PR lanetan aritzen diren langileen gehiengoa emakumeak dira. Postu teknikoagoetan (produkzioan, goi mailako ardura postuetan…), ostera, gizonak dira gehiengoa.

Ekoizleak, bidelagun eta erabaki hartzaile

Alai Ormazabal (ALAI) eta Alejo Orbegozo (Ke Lepo) ekoizleak izan dira solasaldiko bigarren gonbidatuak. Gero eta indar handiagoa hartu duen produktorearen rolaz galdetu diete Julen Idigoras eta Ainhoa Vitoriak.

Ekoizlearen etiketarekin gustura sentitzen ote diren galdetuta, baietz erabaki dute biek, aho batez. Hala ere, beste artista batentzat ekoizten dutenean, bidelagun sentitzen direla azaldu dute biek. Artistei laguntzen eta hartu nahi dituzten bideetan gidari lanak egiten dituzte ALAI eta Ke Lepok. Besteentzako soilik ez eta euren musika propia sortzen urteak daramatzate bi artistak. Produkzioaren munduan murgildu zen unea ekarri du gogora ALAIk: “Ekoizpena ikasi nuen nire musikaren kontrol kreatibo propia izateko, nik hartu nahi nituen nire sonoridadearen inguruko erabakiak”.

Artistekin duten harremanaren gaira itzulita, ‘remix’ eta ‘featuring’aren arteko aldea izan dute hizpide. Ke Leporen kasuan, ‘remix’ik egiten ez duela aitortu du: “Normalean artistak lan handia hartu du dagoeneko eta ez diot zentzu handirik ikusten”. ALAIk, ostera, oso gustura berrinterpretatzen ditu besteen kantak, eta oso ondo pasatzen duela azpimarratu du.