“Q Te Dé Un Poco El Aire”, Idoia eta Tatta elkarrekin, honen disko berriko aurrerapen gisa

Tatta musikariak bere album berriko lehen kanta aurkeztu digu, primizian, “GU” saioan.

Aro berri honetan, urdinez jantzita ikusiko dugu musikaria, baita aurrerago ikusiko dugun arrosa kolorez ere. Irudi aldaketak Tattaren ibilbide profesionalarekin du zerikusia: “Azkenaldian gauza seriotu egin da, profesionalizatzen ari naiz eta soinua asko landu dut”. Martin izeneko diskoa kaleratu zuenetik bi urte igaro diren honetan, musikarekin jolasean jarraitu eta gertatzen zaion orori buruz idazten jarraitzeko asmoa du artistak.

“Q Te Dé Un Poco El Aire” izeneko kanta da estudiora ekarri digun aurrerapena, Idoia Asurmendirekin elkarlanean egindako abestia. Estilo aldetik lotzen ez ditugun arren, hurbileko harremana dutela kontatu digu Tattak. Aurreko lanetan bezala, Denso lankide eta laguna izan du bidaide.

Urte bukaeran etorriko da Tattaren disko berria, Durangoko Azokarako.