Eneko Sagardoy: ‘Aurtengoa ikaragarria izan da, baina ez zait gustatzen aho zabala izatea. Zenbat film ikusi genituen zineman euskaraz pasa den urtean?’

Eneko Sagardoy “Bitan” saioan izan da, Zinemaldi betean, Karmele filma estreinatu berritan.

Alfonbra gorrian eta Victoria Eugenian bertan zeharo hunkitu zela kontatu digu bizkaitar aktoreak. Publikoaren erantzuna ere halakoa izan da: “Jendeak badauka, emoziotik harago, esker on sentsazio bat, eta hori benetan da hunkigarria guretzat”.

Euskal Herriko familia askok frankismo garaian bizitakoa ikus dezakegu filmean. Memoria historikoaz aritu da Eneko: “Garai hartan torturatakoen familientzat bake totala iritsiko da aitortza hori (instituzioena) heltzen denean”.

Euskal zinemaren egoeraz galdetuta, itxaropentsu dago, baina ez da konformatzen. “Euskaraz egindako hainbat film aurkeztu dira Zinemaldian, ez sinistekoa da. Hala ere, ez gara konformatu behar, bultz egiten eta lan onak egiten jarraitu behar dugu. Eta lan txarrak ere egin nahi ditugu, eta horretarako dirua behar da”, azaldu du aktoreak.

Maspalomas filmaren estreinaldia ere izan du hizpide: “Badaude marikoi, bollera eta beste disidenteei gurutzatzen gaituzten biolentzia eta bakardade oso espezifiko batzuk […] Maspalomasek hor jartzen du begia eta benetan hunkigarria da”.

Bukatzeko, Moto-Membra Jesu Nostri antzerki obraz aritu dira Ainhoa, Sara eta Eneko. Duela hiru urte estreinatu zuen antzezlana, eta orain berreskuratu dute: “Datorren astean Esloveniara goaz obra egitera eta aukera zoragarria da euskarazko obra hau hortik mugitzeko”.