Ezpalak taldeko Eñaut Gaztañaga “B Aldea”n izan da, taldearen EP berriaren lehen aurrerapena primizian aurkezteko. Chulería, joder! taldeko Iratxe Perezekin egindako elkarlana da “Burua Galtzen” izeneko kanta.
Aurkeztu berri digun abestia datorren astean kaleratuko duten Bi Alde izeneko EParen abestietako bat da. Bestea, datorren astean aterako da, eta Periferia kataluniar bandarekin egindako kolaborazioa da.
“Diskoetan ez dugu inoiz kolaboraziorik sartu, eta gogoa genuen zerbait berezia ateratzeko”, kontatu digu Gaztañagak. Banda “indartsu” dagoen une honetan aterako da euren lan berria, aurreko diskotik gaur eguneraino sortutako abesti berrien artean bi aukeratuta. Une gozoa bizi du bandak. Musikariak azaldu digunez, zazpi urte hauetan egindako lanaren fruituak jasotzen ari dira, eta Euskal Herritik kanpo eskainitako kontzertuetan ere sekulako babesa jaso dute azkenaldian. Hala ere, 2027an urtebeteko atsedenaldia hartuko dutela aurreratu digu artistak.
Musikariaz gain, ekoizlea da Eñaut Gaztañaga. Bi lanak nola uztartzen dituen galdetu diote Ainhoa Vitoria eta Julen Idigorasek. Denbora gutxi duen arren, besteentzat ekoizten duen bitartean Ezpalakeko melodiak okurritzen zaizkiola kontatu digu gonbidatuak.
