Taylor Swiften disko berria
Espero ez genuen berri bat, espero ez genuen lekuan. Taylor Swiftek The Life of a Showgirl izeneko diskoa kaleratuko duela iragarri du, Travis Kelce bikotekidearen podcastean.
Sare sozialetan zabaldutako bideo batean, Swift eta bere bikotekidea (Travis Kelce futbol jokalaria) elkarren ondoan eserita ikusi ditugu, azken honen podcastean.
Erakusteko zerbait duela dio Swiftek, kutxa batetik binilo bat ateratzen duen bitartean. Diskoa eskuartean duela (edizioan pixelatu egin dute), honakoa dio musikariak: “Nire album berria da hau, The Life of a Showgirl”.
Estatubatuar musikariaren hamabigarren lan luzearen aurre salmenta abuztuaren 13an irekiko dute, Swiften webgune ofizialean iragarri dutenez.
Gainera, musikariak sare sozialetako profileko argazkia aldatu eta giltzarrapo laranja baten irudia jarri du. Hala, swiftiek (abeslariaren zaleek), "aro laranja" bezala bataiatu dute datorrena.
Spotifyn ere izan dugu Swiften lan berriaren inguruko arrastorik. Izan ere, And, baby, that’s a show business for you… izeneko playlista sortu du, Max Martinek ekoitziatako 22 abestiz osatutakoa.
Max Martin Taylor Swiften produktorea izan zen hainbat urtez (Red, 1989 eta Reputation diskoetan), eta urteak daramatzate elkarrekin lanik egin gabe. Hala, kantariaren zaleek sareetan publikatu dutenez, aro horretako lanen antzeko disko bat espero dute.
Swiftek azkenaldian bizi duen urrezko aroaren urrats berria izango da albumaren kaleratzea. Izan ere, estatubatuar musikariak bere lehen sei diskoen eskubideak berreskuratu zituen 2024an, Big Machine zigilu ohiaren kontrako urteetako borrokaren ostean.
Aitorpen profesionalaz gain, Pennsylvaniako artistak 1000 milioitik gorako irabaziak eskuratu zituen iaz Eras birari esker.
