Uda honetan irakurri, entzun eta ikusteko sei gomendio, Gaztearen eskutik

Herri eta hirietako jaiez gain, denbora libreaz gozatzeko unea izaten da abuztua. Tarte horietan irakurri, ikusi edo entzuteko zerbait behar baduzu, hona Gaztearen gomendioak.
Overcompensating
author image

Erredakzioa

2025/08/07 - 12:36

Azken eguneratzea

2025/08/07 - 12:36

Abuztuan oporrak dituzu? Ez? Berdin dio! Gomendio sorta honek udaren hondarraz gozatzeko balioko dizu, etxetik atera gabe bada ere. Ekainetik hona entzun, irakurri eta ikusi ditugunak bildu eta kutunenen zerrenda osatu dizuegu Gaztean.

Zer irakurri

ZOO (Goiatz Labandibar Arbelaitz)

Udako maitasuna, autokarabana berriaz harro dagoen bikote gaztea, umeen atzetik dabilen ama, deskonektatzeko beharra duen funtzionarioa, parranda bila doazen gazte taldeak… Kanpin batean aurki ditzakezun pertsona motak dira denak.

'Zoo' ipuin bilduman, oiartzuar idazleak kanpineko istorioak biltzen ditu, kontaketa jostariaz baliatuz. Oporretako liburuen ezaugarri guztiak betetzen dituen lana.

El cielo de la selva (Elaine Vilar Madruga)

2023ko liburua den arren, uda honetan gehien saldu dutenetako bat dela esan digute Bilboko La Ilusa liburudendan. Karibeko ohian batean gertatzen den beldurrezko istorioak biltzen ditu eleberriak.

Oihanaren, gerraren eta narkoen munduan, emakumeek misio bat dute: ama izan eta tribua elikatzeko haurrak heztea. Emakumearen gorputzaren eta amatasunaren mitoen inguruko nobela hau ez zaizu oharkabean pasako.

 

El cielo de la selva

Zer entzun

Pinkpantheressen ‘Fancy That’

Arduragabetasunetik entzuteko diskoa da Pinkpantheressen Fancy That diskoa. Udan arazoak alde batera uzten saiatzen bazara, lan honek horretan lagunduko dizu. Iazko udako ‘coquette’ eta ‘brat’ kontzeptuak gurutzatzea bezalakoa da.

Kanta arinak eta freskoak, baina, aldi berean, musika dantzagarriaren ertzak esploratzen dituztenak. Kanye West eta Estellen ‘American Boy’  lan luze batera eramatea bezalakoa da britainiar bakarlariaren disko berria.

Miruaren 'MIRUENEA'

Ekaina hasieran iritsi zen gurera Mirua hiruko tolosarraren lehen LPa. Popa, baliabide elektronikoak eta folka topatu ditugu udako argiaz (eta itzalez) gozatzeko 11 abestietan.

Herrietako festetan, plaza dantzan jartzea lortu dute dagoeneko “Morroxko” eta “Salda Badago” abestiek. Biharamunerako, “Bihotz Bat” eta “Kolpatzear den Aizkora”. Autoan abesteko, ostera, bi elkarlan: Hoferekin egindako “Loreak Mendian” eta TOCekin egindako “Lau Begi Eder”.

Zer ikusi

Overcompensating

Prime Video plataforman aurkitu dugu udako telesaila: Overcompensating. Benny (Benito Skynner, telesaileko protagonista eta zuzendaria) unibertsitatera iritsi berri den mutil arrakastatsua da. 

Estatubatuar nerabe heterosexual perfektuaren rolak bultzatuta, bere homosexualitatea ezkutatu eta kide heterosexualen onarpenaren bila ari da, etenik gabe.

Unibertsitatean Carmen (Wally Baram) izeneko neska ezagutuko du, telesailak aurrera egin ahala, lagun min bilakatuko den ikaskidea. Euren trauma eta esperientzia lotsagarrienak kontatuko dizkiete elkarri, unibertsitateko garai nahasiei aurre egiteko biko perfektua osatuz.

Telesail xumea dirudien arren, surrealismoz eta umore garratzez beteriko uneak eskainiko dizkizu. 

Gainera, ataletako batean Charli XCX musikaria agertzen da, unibertsitatera gonbidatutako artista gisa (britainiar abeslaria telesaileko musika produkzioaren arduraduna ere bada).

Desagertuta

Primeranen aurkituko duzue uda honetan pantailari itsatsita utziko zaituen thrillerra. Gau batean lagunekin parrandan atera ostean, Jon Agirre desagertu egin da. Ingurukoek pista bakarra dute: Jonek sare sozialetara igotako azken bideoa.

Poliziak, familiak eta lagunek Jon bilatzen duten bitartean, ikusleek protagonistaren iraganeko argi-ilunak ezagutzen joateko aukera izango dugu. 45 minutu inguruko zortzi atal ditu, pertsiana jaitsi eta udako arratsalde edo gau oso bat bertan murgilduta pasatzeko modukoak.

Ikus entzunezkoei buruzko albiste gehiago

Gehiago kargatu