Gaztea Kabianek bigarren denboraldia abiatuko du irailean, HOFE eta Jimena Amarilloren arteko elkarlanarekin

Gazteak Kabian ekimenaren bigarren denboraldiari ekingo dio irailean. HOFE eta Jimena Amarillo musikariak izango dira lehen ataleko protagonistak. Orozkoko Artiñano etxean bilduko dira bi musikariak, elkar ezagutu eta musika sortzeko.

20 minutu inguruko piezan, bi artistek elkar ezagutzen duten unetik abestia bukatzen duten unera arteko bidea erakutsiko da. Tartean, artista bakoitzak sorkuntzarekin duen harremanaz eta euren arteko elkarrizketez gozatzeko aukera izango da. Elkarrekin sortuko duten abestiaz gain, talde edo bakarlari bakoitzaren kanta bana ere entzungo ditugu Kabianen ataletan.

Iraileko lehen saioaren atariko gisa, elkarrekin konposatu duten kantaren bideoklipa uztailaren 2an estreinatuko da, Gaztean.

“Panpin bat bezala”, HOFE eta Jimena Amarilloren arteko elkarlana

Udako maitasun istorio bat da “Panpin bat bezala” kantaren abiapuntua. Bi artisten musikan ohikoak diren samurtasun eta kostunbrismoaren ildotik sortu dute abestia, poparen bidetik. Jimena Amarillok ekoitzi du abestia, eta hori gutxi balitz bezala, euskaraz kantatzen entzungo dugu valentziar artista, estreinakoz.