Durangoko Azoka, lau eguneko maratoiari eusteko prest
10:30ean ireki dira ateak, eskola eta institutuetako ikasleentzat. 17:00etatik aurrera, zuzeneko saioa egingo du Gazteak, Landako gunetik zuzenean.
Hilabeteetako prestaketa lanak bukatuta, Durangoko Azokak ireki dizkio ateak bere 59. edizioari, "Hartzea ematea DA" lelopean. 10:30etik hasita, Landako guneak lehen eta bigarren hezkuntzako ikasleak hartu ditu Ikasle Goizean, eurentzat propio pentsatutako egitarauarekin.
Urtero legez, azokaren eskaintza hainbat gunetan banatuko da. Ahotsenean 50 liburu eta 34 musika lan aurkeztuko dituzte egileek, Irudienean ikus-entzunezko 40 lan emango dituzte eta Saguganbara haurren espazioan umeei bideratutako lanak izango dira protagonista. Szenatokian, arte eszenikoen gunean, hamar konpainiak pieza laburrak eskainiko dituzte: drama, dantza eta bakarrizketak.
Musika estreinaldiei dagokienez, Gaztean entzuten ditugun artistetako askok baliatuko dute Durangoko Azoka euren lan berriak aurkezteko. Bertan izango dira IZARO, Olatz Salvador, Tatta, Etxepe, TOC, Kai Nakai, Eider, Janus Lester, SÜNE eta beste hainbat musikari.
Durangoko Azokako guneak 10:30etik 20:00etara egongo dira zabalik, eta azken egunean, igandean, 18:00etan itxiko dituzte ateak.
Gaztearen saio berezia
Alain Perez, Julen idigoras eta Ainhoa Arroitajauregik gidatuta, azokan gertatzen ari den guztiaren berri emango dizuegu zuzenean, 17:00etan hasi eta 19:00ak arte egingo dugun saio berezian.
Bertan egongo diren artistak eta gonbidatu bereziak pasatuko dira Gaztearen setetik. Gainera, azokara ere jaitsiko gara; jendearekin hitz egin, kontzertuetan murgildu eta azokako giroaren berri emateko. Irrati bidez entzuteaz gain, streamingez ikusteko aukera ere izango da, Gaztearen YouTubeko kanalean.
Ahotseneko kontzertuak
Talde eta bakarlari askok euren disko berria zuzenean aurkezteko aukera izango dute, Ahotsenea gunean.
Bertan izango dira Eider, Maskak, Kai Nakai, TOC, XSakara, Ezpalak, Eneritz Furyak eta beste hainbat artista ezagun. Pateruenako kontzertuak goizean hasi eta gauera arte luzatuko dira, azokak iraun bitartean. Kontsultatu hemen ordutegi guztiak.
Egunez eguneko zerrendaren errepasoa eginda, Gazteako erredakzioak galdu ezin dituzun hainbat zuzeneko bildu ditugu.
