Bilbao BBK Livek gaur ekingo dio 17. edizioari, Florence+The Machine, M83, Fever Ray eta Amaiarekin
17:00ak aldera entzungo dira aurtengo lehen akordeak. Zazpi oholtzetan banatuta, gustu eta kolore guztietako eskaintzaz gozatzeko aukera izango da. Txopet eta Bengo izango dira lehen eguneko euskal artistak.
Florence+The Machine. Argazkia: Lillie Eiger
Bilbao BBK Livek gaur irekiko ditu ateak, 17:00etan, Kobetamendin. Jaialdiaren hamazazpigarren edizioa indartsu dator lehen egunetik, Florence+The Machine, M83, Fever Ray, Amaia, The Chemical Brothers, Delaporte eta ARCA kartelburuekin.
Iazko legez, zazpi gunetan banatuko da festibaleko musika eskaintza: Nagusia, San Miguel, Beefeater, Txiki, Firestone, Basoa eta Lasai. Lehen bietan, jaialdiko kartelburu nagusiak arituko dira; Lasai eta Basoan, ostera, musika elektronikoak eta naturak bat egingo dute, dagoeneko klasiko bihurtu den esperientzian.
Basoan entzungo dira osteguneko lehen doinuak, 17:00etatik aurrera, Sama Yaxen eskutik. Gero, Violet (19:30), Haai (22:00), ANZ (01:00) eta Call Super (03:00) DJek hartuko dute lekukoa.
Nagusia oholtzan, EEE GEEk irekiko du arratsaldea, 18:25an. Ondotik joango dira Amaia iruindar bakarlaria (20:10), Florence+The Machine (22:40) eta The Chemical Brothers bikotea (01:40).
Jaialdian sartu bezain pronto ikusiko dugu Txiki agertokia. Bertan, Colectivo Da Silva (18:25), Dry Cleaning (20:10), Desire (23:10) eta Delaporte (01:50) arituko dira.
Faxuren hyper popak zabalduko du Firestone karpako egitaraua. Atzetik, Bengo oiartzuar bakarlaria (19:15) eta Art School Girlfrienden dream popa (21:30).
Aurten ere, Lasai izeneko arnasgunea izango da jaialdian. Kobetamendiko begiratokian kokatutako oholtzak Formica (19:00), Olivia (21:00), Xamana Jones (23:00), Phoebe (01:00) eta DJ Der (03:00) artistak hartuko ditu.
Gaztea, Bilbao BBK Liven
Aurten ere, Kobetamendin izango da Gaztea, uztailaren 6tik 8ra bitartean. Egunero saio berezia egingo dute Maite Garmendia, Ibon Fernandez eta Alain Perezek, 20:30etik 21:30era.
Festibalean gertatzen den guztiaren berri behar bezala emateko, txoko berezia prestatu dugu. Iazko legez, San Miguel oholtzaren ondoan egongo da gure seta. Bertatik pasatuko dira jaialdian joko duten artistak eta gonbidatu bereziak. Gurera gerturatzeko aukerarik ez dutenek programaz zuzenean gozatzeko aukera izango dute, gure YouTubeko kanalean eta webgunean. Izan ere, saioa streaming bidez ikusteko parada izango da, baita irrati bidez entzuteko ere.
