Hauek dira Euskal Herriko hiru pizzarik onenak, Gazteako entzuleen arabera
Hainbat izen nabarmendu dira Pizzaren Nazioarteko Egunean sare sozialetan martxan jarri dugun galdetegian. Hona pizzaren maitaleentzako sortutako gida!
Pizza. Argazkia: @dottorpizzavinoecucina
Pizzaren Nazioarteko Egunean, Euskal Herriko pizzarik onenen bilaketa abiatu dugu Gaztearen sare sozialetan. Ezagutzen duten pizzarik gozoena non egiten duten aipatzeko eskatu diogu erabiltzaileei, eta dagoeneko badugu gure rankinga.
Gasteizeko Dottor Pizza vino&cucina
Gasteizeko Dottor Pizza vino&cucina (Errementari kalea, 92) izan da boto gehien eskuratu dituen jatetxea. 2019an ireki zuten negozioa, Nueva Fuera kalean. Orduan, jatekoa bertan batu eta eramateko zerbitzua soilik eskaintzen zuten. 2021an jatetxea lekuz aldatu eta bertan jateko pizzak ematen hasi ziren. Askotariko gutizia aurkitu daitezke bertan, 10 eta 15 euro bitarteko prezioan.
Pizza gozoez gain, italiar gastronomiako beste hainbat jaki tipiko saltzen dituzte. Baita edariak ere. Horietan, izarra, Aperol Spritz koktela.
Demaio
Calabriar jatorriko bi anaiek ireki zuten Demaio, Bilbo Zaharrean (San Frantzisko kalea, 10). Italiako hainbat jatetxetan ofizioa ikasi ostean, Gioel eta Mattias anaiek Demaioren lehen urratsak eman zituzten, 2018an.
Bi pizza mota dastatu daitezke bertan: napolitarra (borobila eta ore finduna) eta erromatarra (lauki zuzena eta ore potoloduna). Egiten dituzten plateren osagaien % 50etik gora Italiatik ekartzen dituzte, jatetxearen webgunean irakur daitekeenez. 12 eta 15 euro bitarteko prezioan saltzen dituzte.
Bertan jateko zein etxera eramateko pizzak egiten dituzte, baita azkenburukoak artisauak ere. Edateko, italiar ardoak, koktelak eta likoreak dasta daitezke Demaio jatetxean.
