Durangoko Azokak euskal youtuberrentzako txokoa prestatu du

Kasik urte osoa daramagu Gaztean Euskal Herriko youtuberren kanalak ezagutzen. Udaberrian abiatu genuen "youtuber" lehiaketa, eta harrezkero, hilero, sari potoloak banatu ditugu bideo onenak igo dituzten erabiltzaileen artean.

Luze jo du, beraz, aipatu lehiaketak, baina Durangoko Azokan bukaerara iritsiko da. Abenduaren 8an, alegia, Azokaren azken egunean, izango da final handia, 19:00etatik aurrera. Egun horretantxe aukeratuko du epaimahaiak zein izan diren urteko Youtubeko kanalik eta bideorik onenak. Hala, kanal onenaren saria jasotzen duenak 2.000 euro eskuratuko ditu. Bideo onenaren egileari, berriz, 500 euro emango dizkiote.

Durangoko Azokak antolatutako 'youtuber' lehiaketak ere leku garrantzitsua beteko du. Hasteko, abenduaren 5ean, 13:00etatik aurrera, tailer bat antolatuko dute.

Bestalde, #youtuberraDA etiketa erabiliz Youtubeko kanaletara Durangoko Azokarekin lotutako bideoak igotzeko deia egin dute. Azokak dirauen bitartean egingo dute lehiaketa. Hortaz, bost eguneko epea dute youtuberrek lehiaketan parte hartzeko, abenduaren 8ko ekitaldi berezian banatuko baitute #youtuberraDA ekimeneko saria (500 euro) ere.