PlayStation Vita aurkeztu du Sonyk

PSP kontsolaren ondorengoak bost hazbeteko ukipen-pantaila, kamera eta giroskopioa izateaz gain, erabat aprobetxatuko ditu sare sozialen aukerak.

'PSVita'. Argazkia: pcactual.com

'PSVita'. Argazkia: pcactual.com

author image

Itziar Urdapilleta

2011/06/07 - 13:34

Azken eguneratzea

2011/06/07 - 16:37

Sony konpainia japoniarrak PlayStation Vita aurkeztu du Los Angelesen, bideo-jokoei buruzko E3 azoka garrantzitsuan. PSP kontsolaren ondorengoa izango da eta berrikuntza ugari dakartza. Bost hazbeteko ukipen-pantaila, bi kamera eta giroskopioa ditu, baita mugimendu analogikoak kontrolatzeko bi aginte ere.

Horrez gain, sare sozialek eskaintzen dituzten aukerak erabat aprobetxatu nahi izan dituzte PS Vitarekin. Hori dela eta, txat funtzioa txertatu diote erabiltzaileak elkarren artean komunika daitezen jolasten ari direnean. Zortzi lagun aritu ahal izango dira aldi berean jolasean.

Kontsola urte amaieran egongo da eskuragarri mundu osoan. Prezioari dagokionez, modeloaren arabera alda liteke. Izan ere, wifi konektibitatea eta 3G teknologia duten kontsolek 299 euro balioko dute; soilik wifia dutenek, ordea, 249 euro.