Facebookek bezala, "Fan Page" funtzioa izango du Tuentik

Ohiturak nahiz gustuak adierazteko erabiltzen dute "Fan Page" izenez ezaguna den zerbitzua Facebookeko erabiltzaileek. Enpresek, berriz, promozio lanetarako hautatzen dute funtzio hau, honi esker, produktuak sustatu eta bezeroarekin hartu-emanetan jarri ahal direlako.

Orain arte Facebook sare sozialak soilik erabiltzen zuen zerbitzu hau, baina, aurrerantzean Tuentik ere aukera hau eskainiko dio erabiltzaileari. "Tuenti Orrialdeak" erremintarekin, beraien afizioen nahiz ohituren berri emango dute gazteek. Estrategia honekin "offline dagoen eduki oro online bihurtu nahi dute" Tuentiko arduradunek.

Modu horretan, datozen egunetan futbol-taldeen, besteak beste, kirolarien nahiz aktoreen aldeko "orrialdeak" sortuko dira. Gainera, argazkiak zein bideoak konpartitzeko asmoz, lagunen arteko orrialdeak ere sortuko dituzte erabiltzaileek.

Bestalde, komunikabideentzako aukera paregabea izango dela diote adituek, "irakurleen, ikusleen nahiz entzuleen" parte hartzea sustatuko duela argudiatuz.