Apirilaren 6an iritsiko dira USB memoriak Xbox 360 kontsoletara

Besteak beste, demoak, partidetako datuak nahiz joko osoak gorde ahal izango dira.

Luzia Zugadi

2010/03/29 - 12:29

Azken eguneratzea

2010/03/29 - 12:46

Datorren apirilaren 6tik aurrera, Xbox 360 bideo-kontsolak USB memoriak erabili ahal izango ditu, datuak gordetzeko. Egun horretan sistema aktualizatuko du Microsoftek, aukera hau eskaini ahal izateko.

Besteak beste, demoak, partidetako datuak nahiz joko osoak gorde ahal izango dira, 16 GB-eko edukiera izango baitu.

Memoria bat konektatzen den lehenengo aldian, bateragarritasun eta osotasun testak gainditu beharko ditu. Behin hori eginda, automatikoki formateatu ahal izango da edo kontsolarako zenbat toki formateatu behar den aukeratu ahal izango du.