McOnak taldearen lan berria ezagutuko dute gaur 'B aldea'ko entzuleek

Urteko abesti onenen errepasoa egin zuten astelehenean Ainhoa Urretabizkaiak eta Xabier Doncelek 'B aldea' saioan, eta atzokoan ere 2015eko kanturik onenak aukeratzen jarraitu zuten. Horrez gainera, Ekain Perezekin izan ziren, "Protesta kantuek" 40ko hamarkadatik 90eko hamarkadara arte izan duten bilakaera aztertzen.

Bestalde, larunbatean emango du Altsasun McOnak taldeak birako lehendabiziko kontzertua. Izan ere, duela gutxi argitaratu duten Galarrena diskoa aurkezten ibiliko dira lekeitiarrak hurrengo hilabeteetan, baina lehenago 'B aldea'n azalduko dute aurrera begira zer asmo duten. Halaber, lan berri horren nondik norakoak argituko dituzte.

Bukatzeko, ostegunean Joseba Ponceren proiektu berria ezagutuko dute entzuleek, eta Ibon Fernandezek ostiraleko 'Pop Track' saioaren aurrerapena egingo du. Hori gutxi ez eta, asteburuko kontzerturen bat edo beste ere hartuko du hizpide.

Hori guztia, aste honetako 'B aldea'n izango duzue, 21:00etatik aurerra.