'B aldea' bereziak luxuzko gonbidatuak izango ditu gaur

Gaur 'B aldea'k saio berezia egingo du Durangoko Azokatik. Hala, entzun ez ezik, ikusi ere egingo duzue Ainhoa Urretabizkaiaren eta Xabier Doncelen zuzenekoa. Izan ere, Azokara gerturatzen zaretenok Landakon bertan ikusiko duzue 'B aldea'rentzat prestatutako platoa. Aitzitik, hara hurbiltzerik ez duzuenok Gaztearen webgunean jarraitu ahal izango duzue, streaming bidez, ordubeteko saioa.

Gonbidatu andana izango dute egun horretan; luxuzko gonbidatuak, guztiak. Lehenik, Ken Zazpi taldearen izenean, Eñaut Elorrietaren bisita jasoko dute. Esne Beltzakoak ere izango dira. Gainera, Fermin Muguruzarekin hitz egiteko aukera izango dute, eta, bukatzeko, azkenaldian denen ahotan dabilen Peiremans+ taldearen etorkizuneko planak ezagutuko dituzte, Imanol Ubedarekin egingo duten solasaldian.

Halaber, Sorkun eta Enkore elkarrizketatuko dituzte, eta aipatu bi artisten bideoklipekin apainduko dute ordubeteko saio mamitsua. Hori gutxi ez eta, Ken Zazpiren, Fermin Muguruzaren eta Esne Beltzaren bideoklip berrien irudiak ere emango dituzte.

Euskal musikaren onena jasoko du, beraz, 'B aldea' bereziak, bideoez gain, abestiek ere izango dutelako lekua bertan. Besteak beste, Izaki Gardenak, Seiurte, Kometa eta EH Sukarra taldeen musika entzuteko aukera izango duzue.