Belceblues taldekoekin izango gara 'B Aldea'n

Astero arrazoiren bat ematen digute Ainhoak eta Xabik 21:00etatik aurrera irratiaren beste aldean, 'B Aldea'n, egoteko. Eta aste hau ez da salbuespena izango.

Itsaso Gutierrezekin On taldea ezagutu ostean, Lurrazpiko Festaren nondik norakoak ezagutu ditugu. Larunbatean, Donostiako Gazteszenan izango da kontzertu sorta, eta tartean Veronica Falls, Sonic Trash vs. Cancer Moon eta Juanita y Los Feos izango dira, besteak beste. Gogoan izan, hara joateko sarrerak zozkatuko ditugula: 5 sarrera bikoitz, guztira.

Oraingoan, Belceblues taldeko Oihan Vegarekin arituko dira solasean. Izan ere, hirukote bergararra munduko blues talde onenekin lehiatuko da Estatu Batuetan, 'Road To Memphis' lehiaketa irabazi, eta Euskal Herria ordezkatzeko txartela eskuratuta.

Eta ostegunean, nola ez, barra librea: zeuk eskatu, eta geuk jarri.

Beraz, ez hutsik egin: astelehenetik ostegunera, 21:00etatik aurrera, igaro zaitez Gaztearen 'B Aldea'ra!