Gazteak “Bitan” izeneko saio berria izango du, asteburuko goizetan, Ainhoa Vitoria eta Sara Alonsoren eskutik

Otsailetik aurrera, asteburuek kolore berria hartuko dute Gaztean. Hilaren 1ean hasita eta Ainhoa Vitoriak eta Sara Alonsok gidatuta, “Bitan” saioa izango dugu entzungai, 9:00etan hasi eta 11:00ak arte.

Musika izango da “Bitan” saioko protagonista nagusia. Gaztean astean zehar entzuten ditugun artistak entzungo dituzue saioan, baina singleaz harago joango dira Ainhoa eta Sara, egungo musikariek eskaintzeko dituzten perla ezkutuak bilatuz.

Asteburua lasai hasteko gonbidapenarekin batera, kulturaz era ariko dira “Bitan”en. Hamabostean behin (igandeetan), zinema izango dute hizpide, presarik gabe, Beñat Uribetxebarria eta Jone Arriola zine zuzendariekin. Beñat eta Jone ez datozen astean, ‘Benetan Zabiz?’ saioko Malen Altuna eta Aitziber Gradosek hartuko dituzte euren lekuak.

Gainera, Amancay Gaztañaga artista eta idazlearen bisita izango dute bi asterik behin. Antzerkia eta kulturaren alorreko beste hainbat gai izango ditu hizpide.

Saioko abestiez gain, musikaz patxadaz aritzeko aukera izango da Gazteako asteburuetako goizetan. Bada, musikari bat gonbidatuko dute bi asterik behin, eta honen proiektuaz luze eta zabal hitz egingo dute.

Gainera, Sara Alonsok disko bat hartu eta antenan disekzionatuko du astero, atzo eta gaurko albumei ahalik eta zuku onena ateraz. Musikaren munduko bitxikeriez, ostera, Ekain Perez kazetari eta musika aditua arduratuko da, hamabostean behin.

Kanpora begiratzeaz gain, barrura begirako tartea ere eskainiko digu saioak. Izan ere, Ibon Fernandez kazetari eta “GU” saioko kideak Gazteako erredakzioan hizpide diren gaiak ekarriko ditu astero, ‘Gossip boy’ izeneko tartean.

Aurkezleek aurreratu digutenez, dagoeneko badute lehen saioko gonbidatuaren izena: IDOIA aramaioar artistak estreinatuko du saioa, otsailaren 1ean.

“Bitan” larunbat eta igandeetan izango da entzungai, Gaztea irratian eta webgunean, 9:00etan hasi eta 11:00ak arte.