'Pop Track' saioak Las Tea Party disko-jartzaileekin dauka hitzordua

Gonbidatu bereziarekin bukatuko du denboraldia 'Pop Track'ek. Gaurko saiorako, egitarau erakargarria prestatu du Ibon Fernandezek. Izan ere, 21:00etatik aurrera, Las Tea Party disko-jartzaile bizkaitarren bisita jasoko du estudioan.

Azkenaldian izandako arrakastaren gainean hitz egingo dute, eta haien kantu zerrenda gertutik ezagutzeko aukera eskainiko diete entzuleei.

2010ean jaio zen Las Tea Party, Eva Gutierrezek eta Lorea Argaratek elkarrekin proiektu berri bat abiatzea erabaki zutenean. Hain zuzen ere, Soraluzeko jaietarako saio berezi bat prestatu zuten garai hartan. Orduz geroztik, moombah, elektro eta trap musika estiloak uztartuz, hainbat herritako aretoak eta jaiak girotzeaz arduratu dira.