Dj /Goo!ren musikak girotuko du ostiraleko 'Pop Track' saioa

Nahasketa berezia prestatu du disko-jartzaile ezagun honek, ostiraleko saiorako. Gainera, elkarrizketa egingo dio Ibon Fernandezek.

author image

Luzia Zugadi

2014/05/27 - 02:00

Azken eguneratzea

2014/05/27 - 18:48

'Pop Track' berezia prestatu du Ibon Fernandezek ostiralerako, 2004tik gaur arte, saio garrantzitsuenetan musika jartzeaz arduratu den /Dj Goo! musikari iruñearra gonbidatu baitu estudiora.

Besteak beste, Bartzelonako Apolo, Madrilgo Sol, Santanderreko Metropol, Bilboko Fever, Valentziako Wha Wha eta Donostiako Bukowski aretoetan aritu da azkenaldian disko-jartzaile ezagun hau. Halaber, talde ezagunen kontzertuetako gonbidatua ere izan da; adibidez, Asian Dub Fundationena eta Bigottena. Hori gutxi ez, eta El Columpio Asesino, Muy Fellini zein Maga taldeen kantuen nahasketak egin ditu.

Oraingoan, ordea, 'Pop Track' saioan du hitzordua. Ostirala girotzeko prestatutako nahasketa entzuteko eta haren esperientzia pertsonala gertutik ezagutzeko aukera izango dute entzuleek.

Amaitzeko, asteburuan egingo duten Primavera Sound jaialdia ardatz hartuta, han parte hartuko duten taldeen musikari egingo dio tartean Ibon Fernandezek.