We Are Standard, Barricada eta Menton de Fogarty, 'Lovin Gaztea'n

Gaztea irratiak 20 urte bete ditu 2010ean eta, urteurren berezi horretarako prestatutako proiektu berezien artean, Lovin Gaztea nabarmendu behar dugu. Azken 20 urteotako 20 balada, 20 maitasun kantu, hartuko ditu ardatz gisa EITB taldeko irrati gazteena prestatzen ari den diskoak eta, abesti horien artean, gaur egun euskal musikaren munduan diren talde eta artista garrantzitsuenetako batzuek zenbait moldaketa berezi egingo dituzte. Duela hilabete batzuk entzun genuen Barricadaren "Bihar berdin izanen da" moldaketa, esaterako, proiektu horren barruan koka dezakegu. Eta moldaketa berezienetako bat jada gauzatu da, We Are Standard taldeak Hertzainaken "Aitormena" abestiaren bertsioa grabatu baitu. Kantu horrekin hasi zen Gaztea irratiaren emisioa duela 20 urte eta, beraz, ezinbestekoa zen bilduma berezi honetan. Uda ostean izango dugu entzungai bertsio berria.