Keane, The View eta James Murphy BBK Liven arituko dira

Zazpi talde berri iragarri ditu Bilbao BBK Live jaialdiak aurtengo ediziorako. Tartean, Keanen, James Murphyren eta The Viewren zuzenekoak baieztatu dituzte eta aipatutako izenez gain, We Are Augustines, Pat Mahoney, Awolnation eta The Black Belles taldeen emanaldiak ere iragarri dituzte gaur.

Britainia Handiko azken hamarkadako talde arrakastatsuenetakoa da Keane. James Murphy, berriz, LCD Soundsystem proiektuari esker ezaguna egin den musikagile estatubatuar bat da. Gainera, Gorillaz eta Outkast taldeekin kolaboratu du honek. Bestalde, The View laukote eskoziarrak punk, pop, folk eta rock musikak uztartzen ditu.

Larunbaterako sarreren salmenta

Ostegunean jarriko dituzte salgai larunbateko kontzertuetarako sarrerak, 50 eurotan (+ banaketa gastuak) eta egun berean uztailaren 12ko egitaraua itxita geratuko da. Izan ere, Bilbao BBK Live jaialdiko lehenengo eguneko egitaraua ixteko izen bakarra falta da (Gazteako Maketa Lehiaketako irabazlea).